Әйелдер лигасының 8-туры: «Томирис-Тұран» Ақтөбеде жеңілді

9 және 10 маусым күндері футболдан әйелдер арасындағы Қазақстан чемпионатының сегізінші турының ойындары өтті. Бұл тур маусымдағы тағы бір команданың алғашқы жеңілісімен аяқталды.

Ойын нәтижелері:

·        «Астана» – «Қайсар» – 2:2

·        «Қайрат» – «Атырау» – 5:1

·        «Елімай» – «Оқжетпес» – 8:0

·        «Ұлытау» – «Тобыл» – 2:2

·        «БИИК-Шымкент» – «Жетісу» – 12:0

·        «Ақтөбе» – «Томирис-Тұран» – 5:0

·        «Қызылжар» – «Жеңіс» – 2:0

Турдағы жеті матчтың алтауы бірінші ойын күнінде өтті. Олардың ішіндегі орталық кездесу – «Ақтөбе» мен «Томирис-Тұран» арасындағы матч болды. Бұл командалар «БИІК»-пен бірге турнир кестесінің көшбасшылары болатын. Алайда чемпиондыққа үміткер екі команда арасында аса қатты тартыс бола қойған жоқ.

«Ақтөбенің» үздік сұрмергені Алина Литвиненко есепті 15-минутта ашты. Сосын бірден екінші голды соғып, қарсыластың ес жинауына мүмкіндік бермеді. Әріқарай тағы үш жауапсыз гол соғылды, Шабуылшы Литвиненко дубль жасап үлгерді.

Бұл жеңіліс «Томирис-Тұранды» турнирлік кестеде төртінші орынға түсіріп жіберді. Ал үшінші орынға өз алаңында «Атырауды» 5:1 есебімен жеңген «Қайрат» көтерілді.

Бұдан да ірі есеп Семейде тіркелді. Жергілікті «Елімай» өз алаңында «Оқжетпестен» 8:0 есебімен ойсырата ұтты. Аталған матчта 18 жастағы шабуылшы Анеля Мамырова хет-трикпен көзге түсті.

Тур аясындағы екі матч – «Астана» мен «Қайсар», сондай-ақ «Ұлытау» мен «Тобыл» кездесулері 2:2 есебімен тең аяқталды.

Ал ең ірі есеп Шымкентте тіркелді. Еліміздің бірнеше дүркін чемпионы «БИІК» Талдықорғаннан келген «Жетісу» командасын қабылдаған. Гүлнара Габелия 13-минутта есеп ашты және жалпы алғанда алты гол соғып, маусымдағы жеке көрсеткішін 30 голға жеткізді. «БИІК» бұл ойында 12:0 есебімен басым түсті.

Турдың соңғы матчы келесі күні, Петропавлда өтті. Мұнда «Қызылжар» «Жеңісті» 2:0 есебімен ұтып, ұпай саны бойынша «Томирис-Тұранды» қуып жетті, бірақ доп айырмашылығы жағынан төмен тұр.

Тоғызыншы тур матчтары (16 маусым):

·        «Оқжетпес» – «Ақтөбе»

·        «Жетісу» – «Ұлытау»

·        «Атырау» – «Қызылжар»

·        «Тобыл» – «Елімай»

·        «Жеңіс» – «Астана»

·        «Томирис-Тұран» – «Қайрат»

·        «Қайсар» – «БИІК-Шымкент».