Каролина Гук: «Астана» алғашқы үш турдағы жеңілістен кейін есін тез жиып үлгерді

Футболдан әйелдер арасындағы Қазақстан чемпионатының 10-турында «Астана» командасы өз алаңында «Атырауды» 9:2 есебімен жеңді. Матчтан кейін елорда командасының қақпашысы Каролина Гук KFF League сайтына сұхбат берді. 

– Каролина, алдымен жеңіс құтты болсын! Ойын жайлы әсеріңізбен бөліссеңіз.

– Көп рахмет. Ең алдымен, баршаңызды жеңіспен құттықтағым келеді. Жалпы алғанда, ойын толықтай біздің бақылауымызда өтті. Команда бар күшін салды және бұл үш ұпайды лайықты түрде еншіледік деп ойлаймын. Алда маңызды ойындар бар. Атап айтсақ «Томирис-Тұран» және «Қайратпен» қызықты кездесулер күтіп тұр. Сол себепті бүгінгі жеңістің маңызы өте зор болды.

–«Астана» маусымдағы алғашқы ірі жеңісіне қол жеткізді. Бұл туралы не айта аласыз?

– Біз бұл жеңіске лайықты болдық. Жаттығуларда көп жұмыс істедік. «БИІК» және «Ақтөбемен» өткен қиын ойындардан кейін команда қайта есін жинап, кейінгі матчтарда мінез көрсете білді. Бар күшімізді салдық. Осындай жеңіске жету үшін қажет нәрсенің бәрін жасап, жоспарды жүзеге асырдық. 

– Қазіргі таңда «Астананың» еншісінде 12 ұпай бар. Команда турнир кестесінде сегізінші орында. Үздік үштіктен 13 ұпайға қалып келе жатырсыздар. Жоғары көтерілуге мүмкіндік бар деп ойлайсыз ба? Команданың мақсаты қандай?

– Әрине, мақсатымыз бар. Ең алдымен жаңа деңгейге көтерілу, дамуымыз қажет. Үздік бестікке кіруге тырысамыз. Оңай болмайтынын түсінеміз, бірақ уақыт өте келе бәрі мүмкін деп сенеміз. Ең бастысы – алға асықпай, кезең-кезеңімен қадам жасауымыз керек. Ол үшін жүйелі түрде жұмыс істеуіміз қажет.