Евстафий Пехлеваниди: Қазақ футболының дамуы үшін Дастан Сәтпаев сияқты таланттар көбірек керек

КСРО чемпионатындағы ең жылдам голдың авторы, физикалық күші мен техникалық шеберлігінің арқасында талай жанкүйердің сүйікті ойыншысына айналған, «Қайраттың» атақты сұрмергені Евстафий Пехлеванидимен 65 жасқа толатын мерейтойы қарсаңында KFF League тілшісі сұхбаттасты.

– Евстафий Алкивиадович, қал-жағдайыңыз қалай? Қазақстандық жанкүйерлерді сағындыңыз ба?

– Барлығы жақсы. Немере бағып өмір сүріп жатырмыз. Әрине, сағындым. Әсіресе Алматыдағы матчтардағы атмосфераны ұмытпаймын. Былтырғы жылы төрт рет Алматыда, үш рет Шымкентте болдым. Бұл сапарларды үлкен қуанышпен еске аламын.

– Биыл сіз 65 жасқа толасыз. Осы мерейтойыңызға орай Қазақстанда қандай да бір шара ұйымдастыруды жоспарлап отырсыз ба?

– Шынымды айтсам, ондай жоспар әзірге жоқ. Бірақ ұсыныс түсіп жатса – қуана қабылдаймын. Қазақстанға әрдайым оралғым келеді.



– Қазіргі таңда Грекияның қай қаласында тұрасыз? Қандай іспен айналысасыз? Отбасыңыз жайлы айтып өтсеңіз.

– Қазір Грекия астанасы Афиныда тұрып жатырмын. Отбасым да осында. Төрт немерем бар – екі қыз, екі ұл. Олар әлі кішкентай. Доп теуіп жүгіріп жүреді. Бірақ футбол жолын таңдай ма, жоқ па – айтуға ерте. Егер футболшы болып жатса қуанар едім.

– Өзіңіз тоғыз жыл ойнаған  «Қайрат» былтыр Қазақстан чемпионы атанды. Матчтарды қадағалап тұрасыз ба?

– Иә, ойындарын қарап жүрдім. Алматыда болғанымда «Қайрат» пен «Ордабасы» арасындағы матчқа бардым. «Қайраттың» жетістіктеріне әрдайым қуаныштымын.

– Былтырғы жылы сізді Шымкенттің «Ордабасы» клубының президентінің құрметті кеңесшісі етіп тағайындады деген ақпарат шықты. Бұл қаншалықты рас?

– Иә, мені құрметті кеңесші ретінде тағайындады. Бірақ екі айдан кейін еш түсініктемесіз қызметтен шеттетіп тастады. Себебін білуге тырыстым, бірақ жауап ала алмадым. Бұл жағдай түсініксіз. Ешқандай кері байланыс болған жоқ. Бұл жайлы қала әкімі біле ме – одан хабарым жоқ.

– Биыл Дастан Сәтпаев есімді жас футболшы жарқырап көрінді. Ол тіпті Лондонның «Челси» клубымен алдын ала келісімшартқа қол қойды. Бұь туралы не айтасыз?

– Жеке өзім Дастанды көрмедім. Бірақ Самат Смақовтың сұхбатын оқыдым. Оның айтқанымен толық келісемін. Балада талант бар. Соны дұрыс пайдаланғанын қалаймын. Ең бастысы – артық жүктемеден шаршап кетпесе екен. Ол клубта және Еуропа ареналарында жастар мен ұлттық құрама сапында негізгі құрамда ойнап жүр Бұл – оңай емес.



– Ал сіз кәсіби футболда қанша жаста дебют жасадыңыз?

– Мен негізгі командаға 16 жасымда қабылдандым, бірақ Шымкент командасында негізгі құрамға әрбір матч сайын шығара бермейтін. Үш маусымнан кейін Алматыға ауыстым. 19 жасымнан бастап негізгі құрамда ойнай бастадым.



– «Қайраттағы» бұрынғы әріптестеріңізбен байланысып тұрасыз ба?

– Иә, әрине. Яровенко, Огай, Масудов, Лубрик, Жұмановпен араласамын. Марқұм Байшақов және Сегізбаевпен де байланыста болдым. 2010 жылы ғана танысқанымызға қарамастан Марат Әбділдәбековпен тіпті жақсы достармыз.

– Қазіргі чемпионатты қадағалап жүрсіз бе? Сіздің ойыңызша, алтын медальға басты үміткер қай команда?

– Шынымды айтсам, бүгінгі қазақстандық футболдағы жағдайдың бәрі бірдей қуанта бермейді. Көптеген сұрақтар бар. Бұл – уақыт пен жүйелі тәсілді қажет ететін күрделі процесс. Ал мәселені шешумен мамандар бар, солар айналыссын.

– Өзіңіз грек футболын жақсы білесіз. Қазақстан Грекиядан нені үйренуі керек деп ойлайсыз?

– Соңғы 20 жылда грек футболында үлкен серпіліс жасалды. Қазақстанда талантты жігіттер бар, бірақ көбірек төзімділік, еңбек пен жүйе қажет. Бастысы – ерте берілмеу керек. Керсінше, өз-өзін дамытуды жалғастыруға ұмтылу қажет. Бұл – ең маңыздысы.

– Сіздің жеткен жетістігіңізді қайталауды армандайтын жас футболшыларға не тілер едіңіз?

– Ең бастысы – еңбек, тәртіп және өз-өзіне деген сенім. Ешқашан берілмеу керек. Сәтпаев сынды футболшылар көбейсе – бәрі жақсы болады.