Қазақстан кубогы: жартылай финал матчтары солтүстіктен басталады

Бүгін, 25 маусымда футболдан Қазақстан Кубогының жартылай финалы басталады. Жеңімпаз екі матчтың қорытындысы бойынша анықталады. 

«Қызылжар» (Петропавл) – «Ордабасы» (Шымкент)

Матчтың басталуы – 18:00
Өтетін орны: «Қарасай» стадионы (Петропавл қаласы)
Жеке кездесулер тарихы: 

Ойындар саны – 44
«Қызылжардың» жеңісі – 18
«Ордабасының» жеңісі – 18
Тең нәтижелер – 8

Қалған төрт үміткердің ішінде Қазақстан Кубогын бұрын-соңды ұтпаған жалғыз команда – «Қызылжар». Петропавл клубы бұл турнирдің финалына тек бір рет қана шыққан. Ол осыдан 25 жыл бұрын болатын. Сол тұста команданың атауы – «Аксесс-Голден Грейн» еді. Солтүстік командасы финалда Алматының «Қайратынан» 0:5 есебімен ойсырай ұтылған.

Ал «Ордабасы» болса, Қазақстанда барлық титулға қол жеткізген.  Дегенмен, бұл жетістіктеріне қарамастан оңтүстіктік ұжымды бұл жұптың айқын фавориті дей алмаймыз. Екі команданың өзара статистикасы әзірге тең. Бұған дейін бір-бірімен 44 рет ойнаса, әр қайсысы 18 рет жеңіске жетіпті. Ал 8 матч тең аяқталған. Гол айырмашылығы бойынша «Қызылжар» алда тұр. 

Бұл екі команданың соңғы кездесуі де тең аяқталған: 2025 жылғы Премьер-лиганың 3-турында «Ордабасы» мен «Қызылжар» 0:0 есебімен тарқасты. Ал 2023 жылғы Қазақстан Кубогының ширек финалында «Қызылжар» 1:0 есебімен жеңіске жеткен. Бұл жолы не боларын бірге көрейік.

«Тобыл» (Қостанай) – «Жеңіс» (Астана)

Матчтың басталуы – 20:00
Өтетін орны: «Орталық» стадион (Қостанай қаласы)

Жеке кездесулер тарихы:

Ойындар саны – 40
«Тобылдың» жеңісі – 13
 «Жеңістің» жеңісі – 18
Тең нәтижелер – 9.

Екі команда айналдырған төрт күннің ішінде бір-бірімен екі рет жолығады. Алдымен осы Кубоктың жартылай финалында, сосын 29 маусымда Премьер-лиганы 14-турында кездеседі. Екі ойында Қостанайда өтеді. 

«Тобыл» биылғы Қазақстан Кубогының басты фавориті саналады. Бұған дейін олар аталған Кубокты 2010 және 2021 жылдары екі рет жеңіп алған.Алайда бұл жолы финалға жолдама алу жоспарына «Жеңіс» айтарлықтай кедергі келтіруі мүмкін. «Жеңіс» Нұрбол Жұмасқалиев шәкірттеріне ыңғайсыз қарсылас. Биылғы маусымның бірінші айналымындағы ойында есеп ашылмай, 0:0 болып тарқасқан. 

Айта кетсек, «Жеңіс» Қазақстан кубогын осы жартылай финалға шыққандардың арасында ең көп ұтқан команда. Өз тарихында астаналық ұжым үш рет қол жеткізген.